शिक्षक सेवा आयोगले निम्न माध्यमिक र माध्यमिक तहको स्थायी शिक्षकको
विज्ञापन फागुनभित्र खुलाउने भएको छ ।
आयोगका कार्यकारी अधिकृत लक्ष्मीराम पौडेलले ०७१ असारदेखि गत असारसम्म
खाली रहेको दरबन्दीमा विज्ञापन गर्न लागेको बताए ।
प्राथमिक तहमा खाली रहेको दरबन्दी पुरा गर्न विज्ञापन खुलाउने मिति
भने अझै अनिश्चित छ । शिक्षा विभागले प्रावि तहमा दरबन्दी मिलान नगर्दा ढिलाई भएको
हो । विभागका अनुसार २९ हजार प्राथमिक विद्यालयमा ८० हजार दरबन्दीका स्थायी शिक्षक
छन् । त्यस्तै २० हजार भन्दा बढी राहतका शिक्षक छन् । प्राविका शिक्षकलाई निमाविमा
समेत समायोजन गर्ने योजना अघि नबढेसम्म विज्ञापन खोल्ने प्रक्रिया रोकिने विभाग
स्रोतले जनाएको छ । प्राविमा आर्थिक वर्ष ०६९/७० पछि रिक्त दरबन्दीमा विज्ञापन भएको छैन ।
आयोगको बार्षिक क्यालेन्डर अनुसार प्राविको विज्ञापन कात्तिकमा
खुलाउनु पर्ने हो । तर, विभागले ०६९ पछि खाली भएको दरबन्दीको तथ्याङक
दिएकै छैन । त्यस्तै निमाविको पुस तेस्रो साता र माविको माघ दोस्रो साता विज्ञापन
गर्ने आयोगको बार्षिक क्यालेन्डरमा उल्लेख गरेको छ । ‘क्यालेन्डर अनुसार केही दिन ढिलाई होला, तर, जसरी पनि विज्ञापन
गर्छौ’ पौडेलले भने, ‘विभागका डीजी र
मन्त्रालयमा सचिवज्यूसंग दरबन्दीको बारेमा छलफल भइरहेको छ । चाडै तथ्याङक दिने
आश्वसन पाएका छौ । उहाँहरुले विज्ञापन गर्ने वातावरण बनाउने प्रतिबद्धता समेत दिने
भएको छ ।’
गत वर्ष निमाविमा एक हजार आठ सय र माविमा एक हजार तीन सयको हाराहारीमा
विज्ञापन खुलाएको थियो । ‘यसवर्ष पनि यही हाराहारीमा विज्ञापन खुल्दैछ’ उनले भने, ‘यो भन्दा बढी हुदैन, बरु कम हुन्छ ।’
साभारः इडियू खबर डट कम
No comments:
Post a Comment